Donnerstag der 11.03.2010 23:43 Uhr
Schließen
Benutzername
Passwort
Login merken   
ANZEIGE
Habd er emal Zeid?: Gebd mer mein Kobf zurück
Eichendlich müssd ich ja auf dem Bildle da obe kobflos sei. Weil e baar hirnlose Debben in der ledzde Woch auf die saublöde Idee komme sin, am Brunne in der Langgass den Kobf von meiner Brunnefigur abzuschlaachen. Auf so en Schmarrn mussde ersd emal komm. Ich fraach mich schon wie bescheuerd enner sei muss, dadermid er so was machd. Vielleichd warns ja a e baar Suffköbf, die wo gemeend ham, des wär lusdich. Egaal, ob die jedz bsoffe warn oder ned, des is ke Schbass mehr, des is einfach schwachsinnich. Wenn die Kerl a bloos e bissele Hirn under ihrm Haaransadz ham, dann solle se den Kobf widder zurückgeb, damid mer die Figur widder zsammsedz kann. Ich kenn nämlich en Haufe Leud, die wo sich im Sommer gern e weng ans Brünnle hocke und die Sonne genießn. Aber mid so em kobf- lose Schorsch siehd des doch e weng komisch aus. Jedz aber zu em andern Dhema. In der nächsde Woch is es fünfesechzich Jahr her, dass unser Würzburch von Bombe in Schudd und Asche geleechd worn is. Und noch immer gibdz Grund genuch (sich) da dran zu erinnern. Grad für die jüngern Mensche in der Schdadt, die wo sich an ke Ruine mehr erinnern könne, kammer gar ned ofd genuch dran erinner, wie grausam so e Kriech is, erschd rechd wemmern vor der eichene Hausdür erleb muss. Ich möchd deshalb jedem embfehl, wenn nächsden Diensdaach um zwanzich nach neun die Gloggen läudn, emal e weng in sich zu gehn und sich vorzuschdell wie sich die Würzburcher bei dem Angriff wohl gfühld ham müsse. Ich schdell mich am sechzehnde März gern emal aufn Balkon, schau über die nächdliche Schdadt und versuch mer vorzuschdell wies wär, wenn blödzlich rund um mich rum Feuer und Exblosione wärn. Des sin so Momende, wo mer richdfich zu schädze lernd, dass mir seid fünfesechzich Jahr Friede ham und dass des so bleib muss. mehr ...